金作坊，一聽店名就知同金扯上關係，店主阿文斯斯人人，說話溫柔，同好多男士一樣自細都是動漫、Figure迷，鍾意砌聖斗士星矢、龍珠等等，閒時亦會DIY做點手作仔，絕無想過一對巧手居然可以變成專業貼金師。

阿文笑說：「好多人問我點解會用金箔去做藝術品？因為我本身好鍾意金嘅，我覺得金係好吸睛、吸眼球。平時我都鍾意喺金舖外面window shopping，但係望咗咁多年嚟嚟去去都只係見到一啲出名嘅公仔好似米奇老鼠，Hello Kitty，都好似仲未見過有金做嘅龍珠，星矢呀呢啲模型公仔出現，成日諗『擺到明係黃金聖鬥士㗎嘛，咁點解無出現呢。』哈哈。咁2020年有個契機啦！嗰陣時租咗個細studio諗住同朋友玩Xbox game，點知遇上疫情又加上限聚令，就忽發奇想，不如試吓趁放假時攞啲金箔去工作室黐喺我心愛嘅模型度啦。第一樣諗到金色嘅就係比卡超，佢本身係黃色㗎嘛，咪試下黐個金色嘅比卡超囉，哈哈。」不過原來想法同真正實行是兩回事，阿文坦言最終用了年半時間研究，不斷失敗再嘗試，才揣摩到貼金箔的細膩技術。

興趣變成商機

他透露：「因為有正職，起初趁放假時用咗年幾時間去調教一啲材料，跟住做咗一個專用膠水，基本上每一件作品都係先塗上專用膠水，然後喺上面鋪上一層金箔才完成。研究完膠水，又要試貼，加上我係完美主義者，整得唔靚就掉，試咗好多好多次先可以貼得薄和靚。」

成功研究到專用膠水，阿文第一件作品－比卡超亦順利「出世」，他將作品po上社交網大晒手藝自娛，竟有知音人撩賣，同時洞悉到貼金工藝好有市場，就開始兼職做金作坊。他透露：「我所有產品都係真金箔嚟嘅，係用鎚仔鎚打好多萬次變到一塊好薄好薄嘅金箔，產品唔怕曬太陽，唔會變色。成功以約3千元賣出第一個比卡超後，我先後整咗4隻比卡超。初時手藝未純熟，貼一個要兩星期左右，之後多生意，工多藝熟，依家一、兩日已經可以起貨。」

經過三年時間洗禮，阿文現累計有作品超過600件，其中有一半係佛牌，一半係模型及造型公仔等等，比起足金金飾，勝價比超高。

激似千足金飾

談到得意之作，阿文表示最有價值的一件產品，應該是年半前、需時兩周的3D打印手辦戰士，他笑言：「個手辦戰士每一個位都好細緻好details又三尖八角，所以做嘅時候要好小心，因為真係好容易整爛，而且係採用咗唔同純度嘅金箔去貼，所以你睇得出有少少唔同層次嘅顏色出嚟，到最後我都能夠成功做出，真係好開心好滿足。」

不斷升級技術

阿文的貼金箔技術亦有演變，他謂：「我當初一心諗住用貼金箔嘅形式去代替噴油，其後就覺得淨係貼金箔有啲單調，所以就去物色一啲新嘅body、模型等等，睇下有冇啲多元發展。見到坊間有一啲公仔或者模型，本身有色，甚至有啲膠珠嘅裝飾，但係啲膠珠唔夠靚，跟住又諗研究吓有冇可能拆走啲膠珠，再洗走啲顏色，然後用貼金箔去代替呢？之後就諗不如用施華洛世奇嘅石，又OK喎!跟住就開始做咗幾樣鑲石產品。」

首個鑲石產品是客人訂製的聚寶盆，阿文回憶說：「之前接到個order叫我做一個聚寶盆去送畀朋友，然後我就去搵一啲靚嘅聚寶盆產品，始終係送禮用嘅所以喺揀材料方面都唔可以忽視，唔可以用膠呀，樹脂等等咁cheap。就揀返金屬，因為睇落去大方得體啲，之後就物色到呢間工廠有呢一啲擺設。不過佢我要用返啲上乘嘅材料將佢改頭換面，變得高貴同埋有自己嘅獨特性。呢個聚寶盆算係我第一件大型改良產品，以前嘅產品都試過洗走啲顏色，不過都係小部分用筆掃兩吓，但今次係成個聚寶盆要洗走原本嘅顏色，所以都試咗好多唔同嘅方法同溝材料。測試咗一段時間終於可以洗走晒啲漆油，又要學吓點樣去鑲啲石。最後交貨時客人猛讚好靚，話如果去金舖買起碼要兩萬蚊，但我只售六千幾，驟眼睇好似千足金飾，對我都打咗支強心針。」

其後，阿文陸續造出更多類型產品，包括旋轉木馬、皇冠、聖誕樹等鑲石工藝品，其中製作水晶玫瑰花最難忘。阿文笑說：「母親節前接到order做支玫瑰花，每一個花瓣用十幾二十粒施華洛世奇石，逐片花瓣做，一朵用上百幾至200粒石，花兩三日先完成。我賣咗一朵之後都冇再宣傳，因為做得好辛苦，做到喊呀。」

開工作坊

幾年間儲落唔少客戶的阿文，幾乎與每一個客人都變成朋友，有部份更會上其studio吹水gathering，向阿文指教貼金技術，店主都毫不吝嗇開心share。阿文說：「有啲客會要求我教下佢哋一啲貼金箔嘅技術，有啲貼完之後都話『嘩！原來都可以好容易，同埋貼得好靚喎！』所以嚟緊有考慮搬間大studio開班。始終傳統貼金箔嘅老師傅唔輕易教人，傳統老師傅嘅貼金技術同我有好大分別，佢哋用專用膠水之後，基本上要憑佢哋嘅經驗喺六個鐘之內，搵啱時間去完成貼金箔嘅工序，早咗或者遲咗都係會失敗嘅。而我當初用咗好長時間去溝啲膠水，最終溝到一隻專用膠水係可以畀我喺兩個星期之內嘅任何時間裏面貼金箔。變相教班時，就算只係小朋友都冇難度。」

先人住金宅

早排，主意多多的阿文仲研究點貼出全金的靚靚骨灰龕，讓大家對先人多一份孝心。他說：「一般骨灰龕都係會採用傳統款式，所以我就大膽試下用金箔去貼一個好靚嘅骨灰龕出嚟去記念先人，可能生前畀唔到豪宅先人住嘅，咁往生後都可以俾間純金做嘅屋，做到先人住金宅，盡表孝意。」

價錢方面有平有貴，冇雕刻的簡單款式設計，連工包料，萬幾蚊可以買到。貼金程序較複雜的宮殿式設計，只需大約三萬零蚊。