《瀟灑》的概念源於「意念創造實相」這個賽斯心法，小巧表示這是描述一種生活狀態，「人生好同壞好睇你觀點與角度點睇，我覺得無論係幾壞，甚至乎幾好都好，你嘅心態點樣去面對你嘅人生係好重要，我覺得『瀟灑』其實係一個幾好嘅狀態，你可以好care free、好無拘無束，可以好自在地去接受你人生嘅變化。」久違了唱作，小巧坦言對歌曲沒有期望，創作《瀟灑》時，仍未與新公司接觸，只是單純的想繼續唱歌、想到寫甚麼題材、想做甚麼類型音樂便寫下來，「係一個好純粹嘅出發點，我覺得首歌要去到一個乜嘢嘅位置，就由佢『瀟灑』咁去啦。」

由有公司到自組公司到「放悠長假期」再簽新公司，小巧謂現在是突然間重拾工作mode的獎態，而且每件事都加上了「deadline」，「新公司每個部門有自己嘅deadline，我自己又會有，所以亦都要配合各樣嘢嘅宣傳啦、製作啦，咁就有deadline囉。」獲公司揼本飛到日本拍MV，小巧笑言這就是有公司跟沒公司最大分別，「多謝公司，係呀日本啲嘢好好食，ありがとう（arigato）！哈哈。」

MV方面，小巧留意到年輕MV導演Elaine，於是透過IG聯繫，希望她能為《瀟灑》MV執導，卻發現Elaine已因工作關係移居東京，同時原來Elaine一直很喜歡小巧的音樂，二人一拍即合，她遂提議小巧飛到日本為她拍攝MV，日本之旅應運而生。和日本當地團隊合作拍攝，小巧大談兩地工作分別，「日本人啲禮貌係做得好足，喺香港係冇咁多『係，唔該晒唔該晒，係。』如果香港係一嘅話，嚟到日本係一百！『係！すみません(sumimasen)、係！ありがとう（arigato）！』長期出現喺對話入面。」由於拍攝期間日本正值受到熱浪浸襲，體感超過四十度。暴露在烈日下，從沙灘走到火車站，再到海邊碼頭，六小時的暴曬令小巧差點中暑。

問到小巧希望一年後的自己會變成如何，她說：「我希望係安穩。返咗嚟香港仲有好多事情轉變，加入新公司有好多人嘅適應，因為始終係同一班全新嘅團隊、創作團隊合作，嗰個安穩我覺得係嚟自心態上嘅一種安全感，即係覺得，settle down啦、個軌道正式開始慢慢向前。」