由導演孫立基執導及監製、講述盜竊身份之奇情高智犯罪新片《查無此人》，鐵定5月23日上畫。

電影描述一班劏房戶看似生活無異，其實各有各呃，潛藏陰暗面，小小蝸居卻是巨大的罪惡溫床。黃定謙（Himmy）戲內飾演劏房股神，每日匿埋刨新聞睇電腦炒股票，一次天降橫財令他游走天堂與地獄，又與「包租公」鄒文正起衝突，被飾演鄒的手下、新演員溫晉傑（Marty）狂毆變豬頭。

畢業於浸大電影戲劇系、廖啟智徒弟Himmy，向來對角色塑造有極嚴謹的追求，埋位前做足功課，狂煲財演股神網片錄音，模仿他們的語腔對話，更刻意為住劏房的角色性格設計得更市井，令角色更入形入格。

談及被打的兩場戲，Himmy說：「有個位拍被打覺得唔夠真，同對手Marty話不如真打，我就用呢下情緒去得再盡啲，好難忘呢一刻，真係腫咗，凸咗出嚟（顴骨附近）；同埋有一下無心之失，拳頭揩到臉，眼個位（眼肚）紅咗，同埋有一下跪求，又係撼到紅咗（額頭）。」Himmy指其角色的結局關乎生死，演繹的時候情緒很波動：「做嘅時候好快就投入，真係好唔想死。我記得拍呢個take，未roll已經喊好犀利，我即刻tune返自己前少少、未去到呢個位（喊）住，去到『𠼮』嘅時候先流露多啲情緒。」

過往Himmy演繹的大多是乖乖仔或者沉穩正義角色，笑言很少人找他做市井、爛撻撻的人物，「今次過程幾滿意，做到自己要求，我覺得100分有80分。」片中他的女友是女團SPIRAL成員兼新演員、23歲的李濰靜（Marvia），Marvia飾演內地富家女，兩人平日靠iPad傳情，Himmy稱讚Marvia：「雖然佢係新人，但好肯做，好肯聽人講嘢亦落力做，導演想佢講嘢內地感重啲，佢又可以有嗰種感覺，佢都有好多input畀我。」另外Himmy和鄒文正、溫晉傑有對手戲，他指鄒文正演出沉穩，大家有交流；至於港菲混血新演員溫晉傑，原來他是Himmy的浸大師弟，Himmy說：「Marty個角色唔多對白，好多時要一個狀態同埋好多動作場面，佢本身唔係真係打開，但打嘅時候好好，同埋佢好願意放棄自己入個狀態，我第一日見到佢就話你好靚仔𠻹。」Marty則說真心欣賞Himmy對演出的投入。

Marvia拍調情戲自感尺度大

Marvia在《查》中透過FaceTime與飾演男友的Himmy調情，有場戲她要性感演出，Marvia表示：「因為係Long D（異地戀），佢哋太耐冇見，一見到大家就情到濃時，我比較緊張，因為我要大尺度演出，比較露肉啲。」她慶幸自己遇上Himmy這個好對手，對方帶她入戲，令她順利完成演繹。

本周末出人出車首次街頭宣傳

《查無此人》將於本周末（20日）舉行首次宣傳活動，主要演員鄒文正、余凱祺、黃定謙、陳善渝、張松枝、陳穎妮、李濰靜、導演及監製孫立基、聯合監製鄭峰嵐均會出席，於尖沙咀街頭向市民派發特製的精美行李牌，出品方UP MEDIA更特別訂製了一部宣傳流動車，相信屆時必定場面熱鬧。