無綫熱爆劇《一舞傾城》劇情寫實貼地，80年代夜總會特色，真實又殘酷，觀眾晚晚追住睇，網民勁讚陳法蓉好演技，前晚淚別唐文龍一幕更牽動人心，搞喊唔少人，網民更一致推舉為「遲來的視后」。

劇集受歡迎，王晶識做地請食飯，昨晚在銅鑼灣安排豐富海鮮宴慰勞台前幕後，難得可以一齊食餐好睇結局，成班演員都好雀躍，陳法蓉帶齊萬國城班囡囡姚子羚、蔡潔、文凱玲、趙碩之、鄺潔楹、莊思敏上陣，唐文龍、何浩文、楊明、李嘉等人全部到齊，關楚耀直頭滿場飛周圍同人玩自拍，劇集要終結，自己都好唔捨得。

被網民認定有機爭視后的陳法蓉開心表示要多謝監製王晶及曾志偉力邀她演出，開飯前更沙律媽上身招呼「老細」，對住鏡頭拋眉眼，相當風騷。

飾演大奸角的李嘉坦言劇集勾起好多童年回憶，「當年經過尖東夜總會成日見好多姐姐出入，好想入去見識下，可惜當時太細入唔到，今次拍劇好似返咗去馬照跑舞照跳嘅年代。」有武術底的他更即席上演臂震斷筷子，贏盡掌聲。

身形嬌滴滴的鄺潔楹轉型拍劇後，機會接腫來，網民勁讚她。何浩文則表示現在長時間留內地發展，兩年前考獲拳擊及健身教練牌，將會參與一部拳擊電影飾演教練，問係咪想向張家輝挑機，何浩文即耍手笑着否認挑機，希望嘗試更多不同角色，所以會繼續努力充實自己。